Бишкек шаарында милиция кызматкерлери күнөөсү жок адамдарды мыйзамсыз кылмыш жоопкерчилигине тарткан фактылар аныкталды. Бул тууралуу Башкы прокуратурадан билдиришти.

Башкы прокуратурадан белгилешкендей, алар борбор калаадагы милиция кызматкерлеринин ишине текшерүү жүргүзгөн. Текшерүү учурунда милиционерлер кылмыштуулук менен күрөш жакшы жүрүп жаткандай түр көрсөтүү максатында бети ачылбаган кылмыштар боюнча жабырлануучулардын кол тамгасын жасалмалоо менен далилдерди бурмалап, кылмыш иштерди кыскарткан жана күнөөсү жок адамдарды мыйзамсыз кылмыш жоопкерчилигине тарткан фактылар аныкталды.

“Көпчүлүк учурда уурулук фактылары боюнча жабырлануучулардын аттарынан тосмо арыздарын жана жарашуу келишимдерин жасалмалап түзүшүп, колдорун коюшкан. Ошондой эле алардын көрсөтмөлөрүн жасалмалоо жолу менен кылмыш иштеринин материалдарына жалган маалыматтарды киргизишип, жарандардын жеке менчикке болгон укуктарын калыбына келтирбей, кылмыш иштерин мыйзамсыз өндүрүштөн кыскартышкан.

Ошону менен бирге аталган категориядагы кылмыш иштер боюнча кылмышка тиешеси жок адамдарды, алардын катышуусусуз ал кылмыштарды жасагандыгын күнөөсүн мойнуна алуу жөнүндөгү көрсөтмөлөрүн жана башка кылмыш ишинин материалдарын бурмалап, процессуалдык документтерге колдорун жасалмалап коюшуп, кылмыш иштерди реабилитацияга жатпаган негиздер менен өндүрүштөн кыскартышкан фактылар орун алган”, — деп айтылат маалыматта.

Текшерүүнүн жыйынтыгы боюнча Бишкек шаарынын ички иштер органдарынын кызматкерлерине карата Кылмыш-жаза кодексинин 337-беренесинин (кызмат абалын кыянаттык менен пайдалануу), 346-беренесинин (кызматтык жасалмачылык), 358-беренесинин (кылмыш-жаза жоопкерчилигинен мыйзамсыз бошотуу) жана 361-беренесинин (далилдерди бурмалоо) негизинде 77 кылмыш иш козголуп, тергөө жүргүзүү Аскер прокуратурасына жана УКМКна тапшырылган.