Октябрда пенсия жогорулайт

Күзүндө Кыргызстанда пенсия индексацияланат. Бул тууралуу Министрлер кабинетинин төрагасынын биринчи орун басары Данияр Амангелдиев «Биринчи радионун» эфиринде билдирди.

Анын айтымында, пенсияны көбөйтүү бюджеттин кирешесинен көз каранды болот. Президенттин тапшырмасы боюнча пенсия жашоо минимумунан төмөн болбошу керек жана бул көрсөткүчкө 2022-2023-жылдары жеткен.

Пенсиянын камсыздандыруу бөлүгүн индексациялоо, мурдагы жылдардагыдай эле, октябрда өтөт.

Кыргызстанда пенсия төмөнкүлөрдөн турат:

▪️Базалык бөлүк — мамлекет тарабынан белгиленген сумма (азыр 3170 сом).

▪️Камсыздандыруу бөлүгү — эмгек стажы жана камсыздандыруу төгүмдөрүн эске алуу менен эсептелген бөлүк.

Бүгүнкү күндө Соцфонддун маалыматы боюнча, пенсиянын минималдуу өлчөмү 7100 сомду, ал эми орточо өлчөмү 11 миң 300 сомду түзөт.