Ошто акча алмаштыруу жайынын ээси өлтүрүлдү

Оштогу акча алмаштыруу жайындагы кол салууда үч баланын атасы бычакталып каза болгон.

Укук коргоо органдарынын маалыматы боюнча, 24-май күнү кечинде белгисиз бирөө Амир-Тимур көчөсүндөгү валюта алмаштыруу жайына кирип, 1992-жылы туулган кызматкер М.Х.га бычак менен кол салган.

Жабырлануучу оор абалда ооруканага жеткирилген, бирок операция учурунда каза болгон.

Милиция шектүү 1988-жылы туулган Т.Н. аттуу адамды кармаган. Тергөөчүлөрдүн айтымында, ал камакка алуу учурунда өзүнө зыян келтирүүгө аракет кылган, бирок кызматкерлер анын муну жасоосуна жол беришкен эмес.

ИИМдин маалыматы боюнча, байкоо камералары валюта алмаштыруу жайына баш кийим жана бет кап кийген киши кирип, кызматкерди бир нече жолу бычактап, акчасын алып, качып баратканын тартып алган.

КРнын Кылмыш-жаза кодексинин "Киши өлтүрүү" беренеси боюнча кылмыш иши козголду. Тергөө иштери уланууда.