ИИМге суу транспорту жана экологиялык коопсуздук боюнча укук бузууларга айып салуу укугун берүү сунушталды. Тиешелүү мыйзам долбоору коомдук талкууга чыкты.

Маалыматка ылайык, башка органдарда суу коопсуздугу жаатында структура түзүү жана укук бузгандарды аныктоо мүмкүнчүлүгү жок. Ал эми ИИМде 2021-жылы Ысык-Көл облусунда туристтик-экологиялык милициянын өзүнчө ротасы түзүлгөн.

"Ошондуктан Ысык-Көл облусунун экологиясына зыян келтирилгендиги боюнча иштердин негизги бөлүгү ИИОнун кызматкерлерине жүктөлүүдө. Бирок бул чөйрөдө тиешелүү ыйгарым укуктардын жоктугуна байланыштуу алар тиешелүү органдардын кызматкерлерин күтүүгө аргасыз. Туристтик-экологиялык милициянын тез иштеши үчүн аларга суу транспорту жана экологиялык коопсуздук чөйрөсүндөгү укук бузууларды кароо жана жаза колдонуу боюнча ыйгарым укуктарды берүү зарыл", — деп жазылат документте.

Ошондой эле Укук бузуулар жөнүндө кодекске бак-дарактарды жана бадалдарды мыйзамсыз кыюу үчүн жоопкерчилик караган берене сунушталууда. Ал үчүн жеке жактарга 1000 сом, юридикалык жактарга 2 миң 800 сом айып пул каралган.