Жогорку Кеңеш шайлоо системасын өзгөртүү боюнча мыйзам долбоорун биринчи окууда кабыл алды.

Жыйында шайлоо күрөөсү, гендердик квота, деги эле мыйзам долбоорунун концепциясы боюнча кызуу талкуу болду.

Депутаттардын сунуштары:

Балбак Түлөбаев партиялар үчүн 9 миллион, талапкерлер үчүн 300 миң сом күрөө көп экенин айтып, азайтууну сунуштады. Анын айтымында, күрөөнү көтөрүү партиялык системаны талкалоого багытталган;

Медер Алиев депутат болуп эки мөөнөттөн ашык шайланууга чектөө киргизүү маселесин көтөрүп, буга жооп кылган Уланбек Примов бул конституциялык укукту чектөө болуп каларын айтты;

Улукбек Ормонов учурдагы шайлоо системасын сактап калуу керектигин, ал эми сунушталган долбоор партиялык системаны жок кыларын белгиледи;

Эмил Токтошев бир мандаттуу округдарда кайра шайлоону жокко чыгаруу зарылдыгын көтөрдү;

Арсланбек Эгембердиев гендердик квота көп добуш алган эркектерге карата адилетсиздик экенин айтты;

Айсулуу Мамашова, Нилуфар Алимжанова гендердик квота керектигин белгилешти. Ал эми депутат Надира Нарматова аялдар үчүн 30 мандатты кепилдеген норманы колдоп, бирок эркектер менен аялдардын бюллетендери башка-башка болушун сунуштады;

Төрага Нурланбек Тургунбек уулу шайлоо күрөөсүнүн көтөрүлүшүн инфляция жана БШКнын жүгүн азайтуу менен түшүндүрдү. Анын айтымында, өзүн-өзү көрсөткөн талапкерлер үчүн шайлоо күрөөсү 100 миң сомдон 300 миң сомго, ал эми 30 талапкерди көрсөткөн партиялар үчүн 9 миллион сомго чейин көтөрүлдү.

“20 жыл мурун 30 миң сом болсо, азыркы 300 миң сом ошол эле деңгээлде. Күрөө талапкерлердин олуттуулугун көрсөтөт”, — деди спикер.

Добуш берүүдө 79 депутат “макул”, 1 депутат “каршы” болду. Эске салсак, мыйзам долбоору боюнча, 30 округ түзүлүп, ар биринен 3 депутат шайланат. 90 мандаттын 30у аялдар үчүн квота катары сакталат.