Бишкек шаарынын мэриясы "Мадина" базарындагы өрттөн кийинки баштапкы чыгым эсептелип, укук коргоо органдарына өткөрүлүп берилгенин билдирди. Калаа мэриясы өрттөн жабыркагандарга компенсация төлөнүп жатканы тууралуу тараган сөздөргө байланыштуу 1-октябрда маалымат таратып, өрт эмнеден чыкканын аныктоо иштери уланып жатканын белгиледи.

Мекеменин маалыматына караганда, Свердлов райондук администрациясы чыгымдын суммасын аныктап чыкты. Ошол эле учурда тергөө иш-чаралары дагы деле уланууда. Окуянын бардык жагдайлары, өрттүн келип чыгышына жооптуу адамдар аныкталууда.

"Ушуга байланыштуу жабыркагандарга компенсация төлөнбөйт деп айтууга азырынча эрте. Бул маселе боюнча тиешелүү иштер улантылууда", - деп айтылды мэриянын маалыматында.

Бишкек мэриясы мындан аркы төлөм жана компенсация маселеси тиешелүү тергөө жана текшерүү иш-чаралары аяктап, келтирилген чыгымдын акыркы өлчөмү аныкталгандан кийин караларын билдирди.

30-августта эртең мененки саат 9дарга жакын Өзгөчө кырдаалдар министрлигине (ӨКМ) базарда өрт чыкканы тууралуу маалымат түшкөн. Аны өчүрүүгө жалпысынан 10 бөлүм тартылган. Тилсиз жоо саат 21:02де толук өчүрүлгөн. Эки куткаруучу жеңил жараат алган. Базар бир аптадан кийин ачылганы менен өрттөн жабыр тарткан соодагерлер бийлик убада кылган жардамдан кабар жок экенин айтып жатышкан.