Соцфонд 1-октябрдан тарта пенсия канча жогорулай турганын айтып берди
1-октябрдан тарта "Мамлекеттик пенсиялык социалдык камсыздандыруу жөнүндө" мыйзамга ылайык, пенсия кайрадан эсептелип чыгат. Бул тууралуу Социалдык фонддун коомчулук менен байланыш бөлүмүнүн башчысы Жеңишбек Мукамбетов "Кабар" агенттигинин түз эфиринде билдирди.
Ал эмне үчүн так ушул мыйзамга таянганын мындайча түшүндүрдү: "Пенсияга тиешелүү башка мыйзамдар да бар. Мисалы, күч түзүмдөрүнүн кызматкерлери үчүн. Бул жогорулатуу аларга тиешелүү эмес. Алар пенсияны башка мыйзамдарга ылайык алышат. Алдын ала белгилүү болгондой, 1-октябрга карата пенсионерлердин саны 818 миңге жетет, ал эми 1-сентябрга карата бул көрсөткүч 814 миңге жакын болчу. Мурунку жылдарга салыштырмалуу өсүш бар. 2010-жылдары алардын саны 530 миңге жакын болчу. Бул пенсияны улгайган адамдар, майыптар, багуучусунан ажырагандар жана башкалар алышат", — деди ал.
Мукамбетов кошумчалагандай, пенсиянын камсыздандыруу бөлүгү 50 миң сомдон жогору болгон пенсионерлер үчүн кошумча төлөм 5000 сомду түзөт.
"Эгерде былтыр пенсионер 6900 сом алган болсо, анда минималдуу жогорулатуу босогосу 600 сомду түзөт. Жалпысынан 1-октябрдан тарта 7500 сом алат. Былтыр президенттин жарлыгына ылайык, пенсиянын минималдуу өлчөмү жашоо минимумуна жеткирилген", — деп белгиледи ал.
