Кытайда 230 миллион адам бойдок. Жаштар арасында никеге жана үй-бүлөлүк жашоого каршы болуу тенденциясы өсүп жатат

Кытайда коомдук түзүлүштө чоң өзгөрүүлөр болуп жатат. Жаштардын көбү бойдок калууну артык көрүүдө. Учурда бойдок адамдардын жалпы саны 230 миллиондон ашып кеткен. Бул тенденция салттуу нике жана үй-бүлөлүк жашоого караганда эркиндикти жана көзкарандысыздыкты баалаган муунду жаратууда. Бул тууралуу Financial Post басылмасы жазды.

Көптөгөн жаш кытайлыктар үчүн никеге турбоо чечими көптөгөн артыкчылыктарды берет. Бойдок калуу менен адамдар каалагандай жашап, коомдун күтүүлөрүнө тынчсызданбастан, эркиндик сезимине ээ болушат. Алар үй-бүлөлүк милдеттерден арылып, өз жашоосун көзөмөлдөөгө мүмкүнчүлүк алышат.

Кытайдагы көптөгөн жаштар үчүн келечек жарык көрүнбөйт: мунун себеби жай экономикалык өсүш, жогорку деңгээлдеги жумушсуздук жана жумуш ордундагы катуу атаандаштык. Натыйжада, көбүрөөк жаштар жолугушуулардан, никеден, үй жана балалуу болуудан баш тартууда. Бул муун көбүнчө «үмүтү үзүлгөн муун» деп аталат жана бул традициялуу үй-бүлөлүк структуралардан кеңири коомдук жылышты чагылдырат.

Акыркы он жылда Кытайдагы никелердин саны эки эсеге азайган. Быйылкы көрсөткүчтөр акыркы 40 жылдагы эң төмөнкү чекке жетиши күтүлүүдө. Төрөт көрсөткүчү да төмөндөөдө жана өлкөдө «Биз — акыркы муунбуз» деген сөздөр барган сайын көп айтылып жатат.

Никеге турууга тоскоолдук кылган негизги факторлордун бири — анын жогорку баасы. Келиндин куну, турак жай жана үйлөнүү үлпөтүнө кеткен чыгымдар көпчүлүк үчүн жеткиликсиз болуп калган.